تحليل عمر الأصول الثابتة PPE Age Analysis

فيه تحليل كامل بيتعمل من غير ولا معلومة داخلية واحدة.

تلات أرقام معلنة في أي ميزانية.

وتلات قسمات بسيطة.

والنتيجة ساعات بتقلب اجتماع توسع لاجتماع طوارئ.

في مقال الفرق بين المحاسب والمحلل المالي شفنا التحليل ده كلقطة سريعة.

شركة صناعية شكلها جاهز للتوسع وطلع إن معداتها فاضلها سنتين عمر إنتاجي.

المقال ده هو الشرح الكامل.

المعادلات وقراءة كل رقم ومتى التحليل بيضلل وإزاي تعرضه للإدارة في سطرين.

التلات أرقام والتلات معادلات

كل اللي محتاجه موجود في صفحة Property Plant and Equipment وهي الممتلكات والآلات والمعدات.

وإيضاحاتها اللي معيار IAS 16 بيلزم الشركات تنشرها.

Gross PPE وهو إجمالي تكلفة الأصول زي ما اتشترت.

Accumulated Depreciation وهو مجمع الإهلاك يعني كل اللي اتستهلك من الأصول لحد النهارده.

Annual Depreciation Expense وهو مصروف الإهلاك السنوي يعني معدل الاستهلاك في السنة الواحدة.

هنشتغل بنفس أرقام المثال الأصلي.

إجمالي التكلفة مليار.

مجمع الإهلاك 800 مليون.

مصروف الإهلاك السنوي 100 مليون.

المعادلة الأولى بتجاوب على سؤال أصولنا عندها كام سنة.

Average Age of PPE = Accumulated Depreciation / Annual Depreciation Expense

800 مليون / 100 مليون = 8 سنوات.

المنطق بسيط.

لو بنستهلك 100 مليون في السنة والمستهلك الكلي 800 مليون يبقى الاستهلاك ده خد 8 سنين.

المعادلة الثانية بتجاوب على سؤال أصولنا اتصممت تعيش قد إيه أصلاً.

Average Total Useful Life = Gross Depreciable PPE / Annual Depreciation Expense

مليار / 100 مليون = 10 سنوات.

المعادلة الثالثة وهي جوهر التحليل كله.

Remaining Useful Life = Net PPE / Annual Depreciation Expense

صافي الأصول 200 مليون / 100 مليون = سنتين فقط.

لاحظ إن التلات أرقام مترابطين.

عمر 8 سنين من عمر كلي 10 سنين يعني الأصول استهلكت 80 بالمية من حياتها المحاسبية.

والمتبقي سنتين هو الفرق.

نفس الميزانية وقصتين مختلفتين

عشان تحس بقيمة النسبة قارن شركتين في نفس الصناعة.

الشركة الأولى هي اللي فوق.

عمر 8 سنين وباقي سنتين.

الشركة الثانية إجمالي أصولها 500 مليون ومجمع إهلاكها 100 مليون ومصروفها السنوي 50 مليون.

العمر = 100 / 50 = سنتين.

العمر الكلي = 500 / 50 = 10 سنوات.

الباقي = 400 / 50 = 8 سنوات.

الاتنين قوايمهم سليمة ومحاسبتهم مظبوطة.

لكن الأولى داخلة على موجة إحلال ضخمة والثانية لسه مجددة أصولها وقدامها طريق طويل.

أي مقارنة بينهم في الربحية أو التدفق من غير الرقم ده مقارنة ناقصة.

لأن الأولى ربحها الحالي مش شايل تكلفة المستقبل القريب.

متى التحليل ده بيضلل

هنا الجزء اللي بيفرق المحلل عن الآلة الحاسبة.

التحليل ده تقديري وليه 4 شروط لازم تتفحص قبل ما تبني عليه.

أولاً طريقة الإهلاك.

المعادلات دي بتفترض القسط الثابت Straight Line يعني إهلاك متساوي كل سنة.

لو الشركة بتستخدم طريقة متسارعة زي Declining Balance فالمجمع بيتضخم بدري والعمر هيبان أكبر من حقيقته.

دور على طريقة الإهلاك في السياسات المحاسبية أول حاجة.

ثانياً الأراضي.

الأراضي جوه PPE لكنها ما بتتهلكش أصلاً.

لو حسبت العمر الكلي على إجمالي فيه أراضي كبيرة هيطلعلك عمر وهمي طويل.

استبعد الأراضي من البسط قبل القسمة.

ثالثاً المشتريات الحديثة الكبيرة.

شركة اشترت خط إنتاج ضخم السنة اللي فاتت هيبان متوسط عمرها صغير.

لكن المتوسط ممكن يكون مخبي أسطول قديم جداً وأصل جديد واحد.

المتوسط بيوصف الكل وما بيوصفش التوزيع.

الإيضاحات وحركة الإضافات بتكشف الحالة دي.

رابعاً الاستبعادات.

لما الشركة تستبعد أصول قديمة بيخرج مجمع إهلاكها معاها من الميزانية.

فالعمر المحسوب بينزل فجأة من غير ما أي أصل جديد يدخل الخدمة.

سنة فيها استبعادات كبيرة بتكسر قابلية المقارنة مع السنين اللي قبلها.

القاعدة العامة.

التحليل ده مؤشر فرز مش حكم نهائي.

قوته إنه بيقولك تحفر فين مش إنه بيوفر عليك الحفر.

فجوة الاستبدال Replacement Cliff

نرجع للشركة الأولى.

باقي سنتين متوسط عمر.

يعني جزء كبير من الأصول هيحتاج يتغير في نافذة زمنية ضيقة.

ده اللي اسمه Replacement Cliff أو فجوة استبدال الأصول.

وأثرها بيضرب في 3 حتت مع بعض.

الأولى CAPEX.

الشركة هتحتاج استثمارات رأسمالية مركزة في سنة أو سنتين بدل ما تكون موزعة على عشر سنين.

وسعر الاستبدال هيكون بأسعار النهارده مش بالتكلفة التاريخية اللي في الدفاتر.

يعني الفجوة الحقيقية غالباً أكبر من رقم الميزانية.

الثانية التشغيل.

الأصول في آخر عمرها بتقف أكتر وصيانتها بتغلى.

فالهوامش بتتاكل قبل الاستبدال ما يحصل أصلاً.

الثالثة التمويل.

لو الكاش الداخلي مش مغطي الموجة فالشركة داخلة على اقتراض أو زيادة رأس مال.

وده بيغير هيكل التمويل والفوايد وكل النسب المبنية عليهم.

ولو عايز تشوف السلسلة دي شغالة جوه نموذج كامل ارجع لقاعدة CAPEX في مقال نموذج القوائم الثلاث.

الاستثمار الرأسمالي بيطلع من التدفق النقدي وبيبني رصيد الأصول.

فجوة الاستبدال بتمشي في نفس السكة بالعكس.

أصول بتنتهي ومفيش CAPEX بيبنيها من تاني.

في كورس التحليل المالي و FP&A بنطبق التحليل ده وأمثاله على قوائم حقيقية في جلسات مباشرة على زووم بتتسجل في نفس اليوم.

ومعاه ملف إكسل جاهز بالتلات معادلات تحط أرقامك وتقرأ النتيجة.

إزاي تعرضه للإدارة في سطرين

أكبر غلطة إنك تقدم التحليل ده كجدول معادلات.

الإدارة مش هتقرأه.

الصيغة اللي بتشتغل سطرين في تقرير الشهر.

متوسط العمر المتبقي لأصولنا الإنتاجية سنتين مقابل عمر كلي 10 سنوات.

خطة الـ CAPEX الحالية لا تغطي قيمة الاستبدال المتوقعة بالأسعار الجارية ونحتاج قرار تمويل خلال 12 شهر.

كده حولت 3 قسمات لقرار على أجندة اجتماع.

وده شغل FP&A في جوهره زي ما شرحنا في مقال ما هو FP&A.

الرقم بيتحول لقصة والقصة بتتحول لقرار.

وأنا شخصيا بحب النوع ده من التحليل لأن مدخلاته 3 أرقام معلنة قدام الكل ومخرجاته سؤال بيغير اتجاه اجتماع.

أعلى عائد على أقل مجهود في التحليل المالي كله.

القرار التحليلي هنا مهم

انخفاض Net PPE مش إدانة.

هو سؤال عن خطة الـ CAPEX.

شركة أصولها كبيرة في السن وعندها خطة استبدال ممولة ومجدولة شركة سليمة.

هي بس بتستخدم أصولها لآخر نقطة كفاءة وده قرار إداري محترم.

وشركة أصولها كبيرة في السن ومفيش خطة وموزعة أرباح عالية كل سنة دي القصة الخطيرة.

لأن التوزيعات دي ممكن تكون متمولة من إهمال الاستبدال.

ربح النهارده على حساب طاقة بكرة.

فبعد التلات قسمات اسأل 3 أسئلة.

فيه خطة CAPEX معلنة ولا لأ.

تكلفة الاستبدال بأسعار السوق الحالية قد إيه مقارنة بالتكلفة الدفترية.

والأصول اللي خلص عمرها المحاسبي لسه شغالة فعلاً ولا واقفة.

لأن العمر المحاسبي تقدير مش حقيقة فيزيائية.

فيه معدات بتشتغل بكفاءة سنين بعد ما تتهلك بالكامل في الدفاتر.

والعكس فيه أصول بتموت قبل عمرها الدفتري.

التحليل بيديك متوسط والزيارة الميدانية والإيضاحات بيدوك الواقع.

وفيه خيط مهم طالع من هنا.

الشركة تقدر تغير تقدير العمر الإنتاجي نفسه وتغير معاه مصروف الإهلاك والأرباح المعلنة.

امتى ده تصحيح مشروع وامتى بيبقى تجميل للأرباح.

ده موضوع مقال جاي لوحده.

الموضوع مرتبط بكورس التحليل المالي و FP&A من المستثمر الصغير.

أسئلة شائعة

أجيب التلات أرقام دي منين بالظبط

من الميزانية والإيضاحات المتممة.

معيار IAS 16 بيلزم الشركة تعرض إجمالي التكلفة ومجمع الإهلاك وحركة السنة من إضافات واستبعادات وإهلاك.

مصروف الإهلاك السنوي هتلاقيه في إيضاح PPE أو في قائمة التدفق النقدي ضمن التسويات.

هل التحليل ده ينفع لكل الشركات

ينفع بقوة للشركات كثيفة الأصول.

صناعة وطاقة ونقل ومستشفيات وفنادق.

وبيفقد معناه في شركات الخدمات والتكنولوجيا اللي أصولها الأساسية ناس وبرمجيات مش آلات.

ولو الشركة مأجرة أصولها التشغيلية فالصورة بتتغير وبتحتاج تبص على حقوق الاستخدام والالتزامات الإيجارية.

هل أقدر أقارن بيه شركتين ببعض

أيوه وده من أحسن استخداماته بشرطين.

نفس الصناعة ونفس طريقة الإهلاك تقريباً.

مقارنة شركة بتستخدم قسط ثابت بشركة بتستخدم طريقة متسارعة مقارنة مضللة من أولها.

النتيجة طلعت مخيفة هل معنى كده أبيع السهم أو أرفض الصفقة

لأ.

النتيجة معناها افتح ملف الـ CAPEX قبل أي قرار.

لو لقيت خطة استبدال ممولة فالرقم المخيف يتحول لنقطة قوة إدارية.

ولو لقيت فراغ فعندك إنذار مبكر سبق السوق بسنتين.